اسلام آباد: پاکستان میں تعینات سعودی سفارت خانے کے فرسٹ سیکرٹری اور لائیزون آفیسر جناب فہد العبدالضیعم نے سرینا ہوٹل اسلام آباد میں منعقدہ پُروقار تقریب کے دوران پاسبان نیوز کی نئی ویب سائٹ کا اپنے دستِ مبارک سے افتتاح کیا۔ اس موقع پر میڈیا، سماجی شعبے اور مختلف تنظیموں سے تعلق رکھنے والی نامور شخصیات موجود تھیں۔
تقریب میں چیف ایڈیٹر پاسبان نیوز محمد عزیزالرحمان مجاہد, پاکستان مسلم لیگ کے مرکزی سیکرٹری اطلاعات غلام مصطفٰی ملک, عائشہ بشیر ہسپتال گجرات کے چیئرمین اور معروف سماجی شخصیت ڈاکٹر اعجاز بشیر, اور ایثار ٹرسٹ پاکستان کے سربراہ محمد عارف خان شریک ہوئے۔
معروف صحافی نوید احمد خان, سبینا اینڈ سنز کے تحسین جاوید چوہدری, اور پاسبان نیوز پشاور کے نمائندہ آفتاب خان نے بھی تقریب میں خصوصی شرکت کی۔
افتتاح کے دوران جناب فہد العبدالضیعم نے پاسبان نیوز کی پیشہ ورانہ کوششوں کو سراہتے ہوئے اس میڈیا پلیٹ فارم کے لیے مستقبل میں اپنی مکمل حمایتی و تعاوُنی پالیسی جاری رکھنے کا اعادہ کیا۔ انہوں نے کہا کہ پاکستان اور سعودی عرب کے دیرینہ اور برادرانہ تعلقات کو مضبوط بنانے میں مثبت اور ذمہ دار میڈیا کلیدی کردار ادا کرتا ہے۔
اس موقع پر چیف ایڈیٹر پاسبان نیوز محمد عزیزالرحمان مجاہد نے اظہارِ تشکر کرتے ہوئے کہا کہ پاسبان نیوز پاکستان اور سعودی عرب کے تعلقات، سفارتی کاوشوں، ثقافتی روابط اور عوامی سطح کے تبادلوں کو خصوصی ترجیح کے ساتھ کور کرے گا۔ انہوں نے کہا کہ سعودی سفارت خانے کی سرپرستی اور تعاون ہمارے لیے باعثِ افتخار ہے۔
تقریب انتہائی خوشگوار ماحول میں اختتام پذیر ہوئی، اور شرکاء نے پاسبان نیوز کی نئی ویب سائٹ کے آغاز پر نیک تمناؤں کا اظہار کیا۔
