اسلام آباد: پارلیمنٹیرینز کمیشن فار ہیومن رائٹس (PCHR) کے زیر اہتمام اسلام آباد میں منعقدہ ایک پروقار تقریب میں سینیٹر دنیش کمار کو Parliamentary Human Rights Award 2025 پیش کیا گیا۔ یہ اعزاز انسانی حقوق، مذہبی آزادی اور پاکستان میں اقلیتی برادری کے آئینی حقوق کے تحفظ کے لیے ان کی قابلِ قدر پارلیمانی خدمات کے اعتراف میں دیا گیا۔

تقریب سے خطاب کرتے ہوئے سینیٹر دنیش کمار نے کہا کہ وہ اس اعزاز کو پاکستان کی تمام اقلیتی برادریوں کے نام منسوب کرتے ہیں جو مساوی حقوق، تحفظ اور آئینی آزادیوں کی امید کے ساتھ آگے بڑھ رہی ہیں۔ انہوں نے کہا کہ ان کی جدوجہد کا بنیادی مقصد ہمیشہ آئینِ پاکستان میں درج اقلیتوں کے حقوق کو عملی شکل دینا اور ایسے مؤثر اقدامات کو فروغ دینا رہا ہے جن سے کمزور طبقات کو حقیقی انصاف اور تحفظ میسر آ سکے۔

سینیٹر دنیش کمار پارلیمانی منارٹی کاکس کے بانی رکن اور کنوینر ہیں۔ وہ پارلیمنٹ میں مذہبی رواداری کے فروغ، جبری تبدیلیٔ مذہب کے خاتمے، اقلیتی برادری کی سیاسی نمائندگی، عبادت گاہوں کے تحفظ اور انسانی حقوق کے قومی و بین الاقوامی معیارات کے حوالے سے فعال اور مؤثر کردار ادا کر رہے ہیں۔ اس کے علاوہ انہوں نے صوبائی سطح پر محکمہ اقلیتی امور کے قیام سے متعلق قانون سازی میں بھی نمایاں خدمات انجام دیں۔

پارلیمنٹیرینز کمیشن فار ہیومن رائٹس کے نمائندگان نے سینیٹر دنیش کمار کی طویل اور مسلسل خدمات کو سراہتے ہوئے کہا کہ ان کی آواز پاکستان میں انسانی حقوق کے فروغ، بین المذاہب ہم آہنگی اور اقلیتوں کے آئینی حقوق کے تحفظ کے لیے ایک مضبوط، باوقار اور توانا علامت بن چکی ہے۔