پاسبان نیوز: شارجہ پولیس نے یکم نومبر سے نافذ ہونے والے مخصوص لین قوانین کے بعد 30 ہزار سے زائد ٹریفک خلاف ورزیاں ریکارڈ کر لی ہیں۔ یہ قوانین موٹر سائیکلوں، ڈیلیوری بائیکس، بسوں اور بھاری گاڑیوں کے لیے مخصوص لین اور روٹس کے تعین سے متعلق ہیں، جن کا مقصد ٹریفک نظم و ضبط اور سڑکوں کی حفاظت کو یقینی بنانا ہے۔

شارجہ پولیس کے مطابق زیادہ تر خلاف ورزیاں ڈرائیورز کی جانب سے لازمی طور پر مقرر کردہ لین اور روٹس کو نظرانداز کرنے کے باعث ہوئیں، جو وفاقی ٹریفک قانون کی صریح خلاف ورزی ہے۔ حکام نے واضح کیا کہ بھاری گاڑیوں کے لیے مخصوص لین کی پابندی نہ کرنے پر آرٹیکل 8 کے تحت 1500 درہم جرمانہ اور 12 بلیک پوائنٹس عائد کیے جاتے ہیں، جبکہ ٹریفک سائنز اور ہدایات کی خلاف ورزی پر آرٹیکل 70 کے تحت 500 درہم جرمانہ مقرر ہے۔

پولیس نے ڈرائیورز پر زور دیا ہے کہ وہ قوانین کی مکمل پاسداری کریں تاکہ حادثات میں کمی، ٹریفک کی روانی اور عوامی تحفظ کو یقینی بنایا جا سکے۔ شارجہ پولیس کا کہنا ہے کہ نگرانی اور نفاذ کا عمل مزید سخت کیا جائے گا۔