کھاریاں:
پاکستان بزنس فورم کھاریاں کے صدر وقار احمد ڈار اور سینئر قانون دان سید ضیا اللہ شاہ ایڈووکیٹ نے اپنے ساتھیوں کے ہمراہ نومنتخب صدر شہباز اسلام مرزا اور ان کے مکمل پینل سے ملاقات کے لیے انتخابی دفتر کا دورہ کیا۔
ملاقات کے دوران وفد نے شہباز اسلام مرزا اور ان کی ٹیم کو کامیاب انتخاب پر مبارکباد پیش کی اور اس امید کا اظہار کیا کہ نئی قیادت تاجر برادری کو درپیش مسائل کے حل کے لیے مؤثر، منظم اور ہمہ جہت کردار ادا کرے گی۔
ذرائع کے مطابق ملاقات میں بازاروں کو درپیش انتظامی مسائل، ٹیکس پالیسیوں، کاروباری سہولت کاری اور مقامی سطح پر تاجر برادری کے تحفظ جیسے امور پر تفصیلی تبادلہ خیال کیا گیا۔ فریقین نے اس بات پر اتفاق کیا کہ تاجر تنظیموں کے درمیان باہمی تعاون، اخوت اور بھائی چارے کی فضا قائم رکھنا وقت کی اہم ضرورت ہے۔ پاکستان بزنس فورم کے وفد نے نئی قیادت کو تاجر برادری کے اجتماعی مفادات کے لیے ہر ممکن تعاون اور مشاورت کی یقین دہانی کرائی، جبکہ نومنتخب قیادت نے بھی تمام تاجر تنظیموں کو ساتھ لے کر چلنے اور مشترکہ مسائل پر مشترکہ حکمت عملی اختیار کرنے کے عزم کا اظہار کیا۔
وفد میں سید فیاض شبیر بخاری (نائب امیر جماعت اسلامی کھاریاں جی ٹی روڈ)، محمد عارف خان (ڈنگہ روڈ)، انجینئر سعید احمد (مین بازار)، عتیق الرحمن اور کاشف حسین (گلیانہ روڈ) شامل تھے۔ تجارتی حلقوں کے مطابق اس ملاقات کو مقامی سطح پر مثبت پیش رفت قرار دیا جا رہا ہے، جس سے تاجر برادری کے درمیان ہم آہنگی اور مسائل کے حل کے لیے مشترکہ کوششوں کو فروغ ملنے کی توقع ہے۔
