پاسبان نیوز: ایکسڑا اسسٹنٹ کمشنر بھمبر، قیصر محمود شمس نے بھمبر کے تاریخی مقام باولی کا تفصیلی دورہ کیا۔ یہ دورہ ڈپٹی کمشنر بھمبر، چوہدری حق نواز کی خصوصی ہدایات کی روشنی میں کیا گیا، جس کا مقصد ضلع میں سیاحت کے فروغ کے لیے تاریخی ورثے کے تحفظ اور بحالی کے اقدامات کا جائزہ لینا تھا۔

دورے کے دوران باولی کی صفائی ستھرائی، تزئین و آرائش اور اسے اس کی اصل حالت میں بحال کرنے کے حوالے سے ایک جامع جائزہ رپورٹ مرتب کی گئی۔ اس موقع پر ایکسڑا اسسٹنٹ کمشنر نے کہا کہ ڈپٹی کمشنر کی ہدایت پر محکمہ آثارِ قدیمہ (آرکیالوجی ڈیپارٹمنٹ) کو متحرک کیا جائے گا تاکہ ضلع میں موجود تاریخی اور ثقافتی مقامات کا مؤثر تحفظ یقینی بنایا جا سکے۔

انہوں نے مزید کہا کہ ضلع بھمبر تاریخی، جغرافیائی اور ثقافتی اعتبار سے غیر معمولی اہمیت کا حامل ہے۔ یہاں متعدد سیاحتی مقامات موجود ہیں، تاہم تاریخی باولی اپنی منفرد شناخت اور قدیم تاریخ کی وجہ سے ایک خاص مقام رکھتی ہے۔ اس تاریخی ورثے کو اس کی بنیادی اور اصل حالت میں بحال کرنا ضلعی انتظامیہ کی اولین ترجیح اور مشن ہے، تاکہ آنے والی نسلیں بھی اپنے تاریخی ورثے سے آگاہ ہو سکیں۔