خبر (پاسبان نیوز، گجرات): جماعت اسلامی ضلع گجرات اور الخدمت فاؤنڈیشن ضلع گجرات کے اشتراک سے ایک تاریخی سنگِ میل عبور کرتے ہوئے ضلع گجرات میں بنو قابل آئی ٹی پروگرام کے تحت آئی ٹی کلاسز کا باقاعدہ آغاز کر دیا گیا ہے۔ گزشتہ روز ان کلاسز میں تدریسی سرگرمیوں کا عملی طور پر آغاز ہو چکا ہے، جہاں ہزاروں طلبا و طالبات کو مفت جدید آئی ٹی تعلیم فراہم کی جائے گی۔
یہ پروگرام نوجوان نسل کو بااختیار بنانے، روزگار کے نئے مواقع پیدا کرنے اور ڈیجیٹل مہارتوں سے آراستہ کرنے کی ایک بڑی اور مؤثر کوشش ہے۔ بنو قابل آئی ٹی کلاسز میں جدید کورسز کے ذریعے طلبا کو آئی ٹی، فری لانسنگ اور ڈیجیٹل ٹیکنالوجی سے وابستہ مہارتیں سکھائی جائیں گی تاکہ وہ ملکی و عالمی سطح پر باعزت روزگار حاصل کر سکیں۔
واضح رہے کہ کچھ عرصہ قبل بنو قابل پروگرام کا باقاعدہ افتتاح امیر جماعت اسلامی پاکستان حافظ نعیم الرحمن نے کیا تھا، جسے نوجوانوں کے مستقبل کی تعمیر کی جانب ایک انقلابی قدم قرار دیا گیا۔ افتتاحی موقع پر حافظ نعیم الرحمن نے کہا تھا کہ تعلیم، بالخصوص آئی ٹی تعلیم، ہی پاکستان کے نوجوانوں کو خود کفیل اور ملک کو معاشی طور پر مضبوط بنا سکتی ہے۔
ضلعی سطح پر جماعت اسلامی اور الخدمت فاؤنڈیشن کے ذمہ داران نے اس عزم کا اظہار کیا ہے کہ بنو قابل پروگرام کے ذریعے زیادہ سے زیادہ نوجوانوں تک معیاری اور مفت آئی ٹی تعلیم پہنچائی جائے گی، تاکہ ضلع گجرات کو تعلیمی و تکنیکی ترقی کا ماڈل بنایا جا سکے۔ شہریوں، والدین اور طلبا کی جانب سے بنو قابل آئی ٹی کلاسز کے آغاز کو خوش آئند قرار دیا جا رہا ہے اور اسے نوجوانوں کے روشن مستقبل کی جانب ایک امید افزا قدم کہا جا رہا ہے۔
