خبر (پاسبان نیوز | عالمی): دبئی ڈیوٹی فری نے سال 2025 میں شاندار کارکردگی کا مظاہرہ کرتے ہوئے اپنی 42 سالہ تاریخ کا سب سے کامیاب سال مکمل کر لیا۔ دبئی ڈیوٹی فری کی جانب سے جاری اعداد و شمار کے مطابق 2025 کے دوران مجموعی فروخت 8.680 ارب درہم (2.378 ارب امریکی ڈالر) تک پہنچ گئی، جو 2024 کے مقابلے میں 9.85 فیصد اضافہ ہے۔
یہ غیر معمولی کامیابی دس ایسے مہینوں کے باعث ممکن ہوئی جن میں ماہانہ فروخت کے نئے ریکارڈ قائم ہوئے، جبکہ دسمبر 2025 دبئی ڈیوٹی فری کی تاریخ کا سب سے زیادہ فروخت والا مہینہ ثابت ہوا۔ صرف دسمبر میں فروخت 922.77 ملین درہم تک پہنچ گئی، جو دسمبر 2024 کے مقابلے میں 12.27 فیصد زیادہ ہے۔
ریکارڈ فروخت میں 20 دسمبر کو دبئی ڈیوٹی فری کی 42ویں سالگرہ کے موقع پر دی جانے والی 25 فیصد خصوصی رعایت نے بھی اہم کردار ادا کیا، جس کے نتیجے میں صرف 24 گھنٹوں میں 69.097 ملین درہم کی فروخت ریکارڈ کی گئی۔
دبئی ڈیوٹی فری کے منیجنگ ڈائریکٹر رامیش سدھمبی نے اس تاریخی کامیابی پر ردعمل دیتے ہوئے کہا کہ “2025 کے شاندار نتائج ہماری ٹیم کی محنت، استقامت اور لگن کا مظہر ہیں، جبکہ سپلائرز اور برانڈ پارٹنرز کے تعاون نے کسٹمر انگیجمنٹ اور خریداری کے رجحان کو مزید مضبوط کیا۔”
انہوں نے دبئی ڈیوٹی فری کے چیئرمین شیخ احمد بن سعید المکتوم کا بھی خصوصی شکریہ ادا کیا جن کی قیادت اور رہنمائی نے اس سنگِ میل کو ممکن بنایا۔
اعداد و شمار کے مطابق 2025 میں فروخت کی شرح مسافروں کی تعداد میں اضافے سے بھی تقریباً 5 فیصد زیادہ رہی، جو دبئی ڈیوٹی فری کی مؤثر مارکیٹنگ حکمتِ عملی اور فی مسافر خریداری میں اضافے کی واضح دلیل ہے۔
مصنوعات کے لحاظ سے پرفیومز سب سے زیادہ فروخت ہونے والا شعبہ رہا، جس کی فروخت 1.601 ارب درہم (کل فروخت کا 18.45 فیصد) رہی۔ اس کے بعد شراب (1.061 ارب درہم)، سونا (896.46 ملین درہم)، تمباکو (883.60 ملین درہم) اور کنفیکشنری (845.49 ملین درہم) نمایاں رہے۔ کنفیکشنری کی فروخت میں 719 ٹن دبئی چاکلیٹ شامل تھی، جن میں خصوصی مصنوعات بھی شامل رہیں۔
آن لائن فروخت 230.06 ملین درہم رہی، جو مجموعی فروخت کا 2.65 فیصد ہے۔ سال بھر میں 2 کروڑ 10 لاکھ سے زائد ٹرانزیکشنز ہوئیں، اوسطاً یومیہ 58 ہزار سے زائد خریداری کی گئی، جبکہ 5 کروڑ 68 لاکھ یونٹس فروخت ہوئے۔ روانگی کے لاؤنجز سے فروخت مجموعی آمدن کا 90.6 فیصد رہی، جبکہ آمد پر خریداری کا حصہ 6.35 فیصد رہا۔ ماہرین کے مطابق 2025 کے نتائج اس بات کا واضح ثبوت ہیں کہ دبئی ڈیوٹی فری عالمی ٹریول ریٹیل میں بدستور ایک مضبوط اور قائدانہ حیثیت رکھتا ہے، جو جدت، کسٹمر فوکس اور اسٹریٹجک ترقی کے امتزاج سے مسلسل نئے ریکارڈ قائم کر رہا ہے۔
