صدر گجرات چیمبر آف کامرس اینڈ انڈسٹری احمد حسن نے فیڈریشن آف پاکستان چیمبرز آف کامرس اینڈ انڈسٹری کے لاہور آفس میں فیڈرل سیکرٹری وزارتِ تجارت جواد پال سے ملاقات کی، جس میں گجرات کے ایکسپورٹ سیکٹر کو درپیش اہم مسائل اور ان کے ممکنہ حل پر گفتگو کی گئی۔

صدر چیمبر نے بتایا کہ گجرات کی مجموعی برآمدات کا حجم تقریباً 150 ملین امریکی ڈالر ہے، جس میں برقی پنکھے سب سے بڑا برآمدی شعبہ ہیں۔ انہوں نے کہا کہ گجرات کی صنعتیں برآمدات میں نمایاں صلاحیت رکھتی ہیں، تاہم نئی بین الاقوامی منڈیوں تک رسائی، تجارتی وفود، بزنس ٹو بزنس روابط اور مؤثر سفارتی معاونت کے بغیر اس صلاحیت سے مکمل فائدہ نہیں اٹھایا جا سکتا

انہوں نے توانائی کے بلند نرخوں، سیلز ٹیکس و ایکسپورٹ ریفنڈز میں تاخیر، مشینری کی درآمد کے لیے لیٹر آف کریڈٹ کھولنے میں رکاوٹوں، اور فین انڈسٹری کے لیے ڈی ایل ٹی ایل اسکیم کی عدم بحالی کو سنگین مسائل قرار دیا۔ صدر چیمبر نے فین ایکسپورٹرز کو درپیش بینکنگ و ادائیگیوں کے مسائل، خاص طور پر تھرڈ پارٹی ادائیگیوں کی کلیئرنس، پر بھی توجہ دلائی۔

مزید برآں انہوں نے ایس ایم ایز کے لیے ٹیکنالوجی ٹرانسفر، تحقیق و ترقی کے لیے حکومتی معاونت، وسط ایشیائی ممالک کے لیے متبادل تجارتی راستوں اور نئے ایکسپورٹرز کے لیے ایکسپورٹ فسیلیٹیشن اسکیم میں نرمی کا مطالبہ کیا۔

فیڈرل سیکرٹری کامرس جواد پال نے گجرات کے ایکسپورٹرز کے مسائل کے حل کے لیے متعلقہ اداروں کے ساتھ مشاورت اور عملی اقدامات کی یقین دہانی کرائی۔ اس موقع پر عمران وڑائچ ، علی شان جمشید اور عادل اشرف ایگزیکٹو ممبران بھی موجود تھے ۔