پاسبان نیوز: چودہ برس بعد بنگلہ دیش اور پاکستان کے درمیان براہِ راست پروازیں دوبارہ شروع ہونے جا رہی ہیں جس سے دونوں ممالک کے درمیان بہتر ہوتے تعلقات اور بدلتی علاقائی صورتحال کی عکاسی ہوتی ہے۔ اس امر کی تصدیق بنگلہ دیش کی قومی فضائی کمپنی نے جمعرات کے روز کی۔

بنگلہ دیش ایئرلائنز ِبیمان کے مطابق ڈھاکہ سے کراچی کے لیے پہلی پرواز 29 جنوری کو روانہ ہوگی اور اس روٹ پر ہفتے میں دو پروازیں چلائی جائیں گی۔ یہ 2012 کے بعد دونوں ممالک کے درمیان پہلی باقاعدہ مسافر پرواز ہوگی۔

ایئرلائن کے منیجر بوسرا اسلام نے اے ایف پی کو بیان دیتے ہوئے کہا،’’ ہم ڈھاکہ-کراچی روٹ کو دو ہفتہ وار پروازوں کے ساتھ دوبارہ متعارف کرا رہے ہیں۔‘‘

بنگلہ دیش بیمان ایئرلائنز نے اپنے بیان میں کہا، براہِ راست پروازوں کی بحالی سے دونوں ممالک کے درمیان رابطہ نمایاں طور پر بہتر ہوگا، جس سے کاروباری سفر، سیاحت اور خاندانوں کی ملاقاتوں کے مواقع بڑھ جائیں گے۔