لاہور (خصوصی رپورٹ) پاکستان مسلم لیگ کے صدر اور سابق وزیراعظم چوہدری شجاعت حسین سے عائشہ بشیر کلیفٹ ہسپتال گجرات کے کوآرڈی نیٹر عزیزالرحمان مجاہد نے ملاقات کی۔ اس موقع پر عزیزالرحمان مجاہد نے انہیں 12 اکتوبر سے شروع ہونے والے انٹرنیشنل کلیفٹ کیمپ کے حوالے سے بریفنگ دی۔

انہوں نے بتایا کہ ڈاکٹر اعجاز بشیر کی قیادت میں اب تک 28 ہزار سے زائد ایسے بچوں کا مفت اور عالمی معیار کے مطابق علاج کیا جا چکا ہے جن کے ہونٹ کٹے ہوئے تھے یا تالو میں پیدائشی نقائص پائے جاتے تھے۔ عائشہ بشیر کلیفٹ ہسپتال گجرات اپنی نوعیت کی منفرد اور نمایاں خدمات انجام دے رہا ہے اور ملک بھر کے مستحق بچوں کے لیے امید کی کرن بن چکا ہے۔

عزیزالرحمان مجاہد نے کہا کہ ڈاکٹر اعجاز بشیر اور ان کی ٹیم دن رات مستحق بچوں کی خدمت کے لیے سرگرم عمل ہیں۔ انہوں نے بتایا کہ 12 اکتوبر سے شروع ہونے والا انٹرنیشنل کلیفٹ کیمپ پاکستان کے لیے ایک اعزاز ہوگا، جس میں ملکی اور غیر ملکی ماہر ڈاکٹرز شریک ہوں گے اور جدید ترین طبی سہولتوں کے ذریعے بچوں کا علاج کیا جائے گا۔

اس موقع پر اظہار خیال کرتے ہوئے چوہدری شجاعت حسین نے کہا کہ عائشہ بشیر کلیفٹ ہسپتال گجرات ایک عظیم مشن پر کام کر رہا ہے، جس کے ذریعے ہزاروں خاندانوں کے دکھوں کا مداوا کیا گیا ہے۔ انہوں نے کہا کہ وہ ذاتی طور پر ڈاکٹر اعجاز بشیر اور ان کی ٹیم کو جانتے ہیں اور ان کی محنت و خدمت کو خراجِ تحسین پیش کرتے ہیں۔

چوہدری شجاعت حسین نے مزید کہا کہ انہوں نے صوبائی وزیر چوہدری شافع حسین کو ہدایت دے رکھی ہے کہ وہ ہسپتال کی انتظامیہ سے مسلسل رابطے میں رہیں اور ہر ممکن تعاون فراہم کریں تاکہ کسی قسم کی رکاوٹ نہ آئے۔ انہوں نے یقین دہانی کرائی کہ پاکستان مسلم لیگ اس انسان دوست مشن کی سرپرستی جاری رکھے گی تاکہ مستحق بچے صحت مند اور روشن مستقبل کی طرف بڑھ سکیں۔

سابق وزیراعظم نے مزید کہا کہ “عزیزالرحمان مجاہد بھی ہمارے ضلع کا ایک قیمتی اثاثہ ہیں۔ میں انہیں 2012 سے جانتا ہوں اور ان کی سماجی و صحافتی خدمات قابلِ ستائش ہیں۔”

ماہرین کے مطابق عائشہ بشیر کلیفٹ ہسپتال کی اب تک کی خدمات ایک بڑی کامیابی ہیں، جہاں ہزاروں غریب اور مستحق بچوں کو بغیر کسی معاوضے کے عالمی معیار کا علاج فراہم کیا گیا ہے، اور آنے والا انٹرنیشنل کیمپ اس مشن کو مزید وسعت دینے میں سنگِ میل ثابت ہوگا۔