اسلام آباد (پاسبان نیوز) — پاکستان میں تعینات ترکی کے سفیر ڈاکٹر عرفان مہمت پچاجی نے کہا ہے کہ ترکی پاکستان میں نابینا کھلاڑیوں (بلائنڈ اسپورٹس) کے فروغ کے لیے ہر ممکن تعاون فراہم کرے گا۔ وہ یہ بات پاکستان بلائنڈز اسپورٹس فیڈریشن کے زیر اہتمام منعقدہ ایشیا پیسفک گول بال چیمپیئن شپ 2025 کی اختتامی تقریب سے بطور مہمانِ خصوصی خطاب کرتے ہوئے کہہ رہے تھے۔

تقریب میں مختلف ممالک سے شریک ٹیموں، کھلاڑیوں، کوچز، اور خصوصی بچوں کے اسکولز کے نمائندگان نے بھی شرکت کی۔ سفیرِ ترکی ڈاکٹر عرفان نے اپنے خطاب میں کہا کہ کھیل نہ صرف جسمانی صحت بلکہ ذہنی اعتماد اور معاشرتی شمولیت کا بہترین ذریعہ ہیں، اور خصوصی افراد کے لیے ان کی اہمیت دوچند ہو جاتی ہے۔ انہوں نے کہا کہ پاکستان میں موجود ترکی کا سفارت خانہ آئندہ دنوں میں بلائنڈ اسپورٹس کے فروغ کے لیے ایک جامع پروگرام شروع کرے گا جس کے تحت پاکستان کے تمام خصوصی بچوں کے اسکولوں میں تربیتی سیشنز، آگاہی سیمینارز اور کوچنگ ورکشاپس کا انعقاد کیا جائے گا۔

ڈاکٹر عرفان نے مزید اعلان کیا کہ ترکی خصوصی طور پر تمام ٹرینرز، کوچنگ کورسز اور تربیتی سرگرمیوں کو اسپانسر کرے گا تاکہ پاکستان کے نابینا کھلاڑی عالمی سطح پر بہترین کارکردگی دکھا سکیں۔ ان کا کہنا تھا کہ “ہمیں فخر ہے کہ پاکستان میں خصوصی کھلاڑی اپنی ہمت، حوصلے اور جذبے سے کھیلوں میں نمایاں مقام حاصل کر رہے ہیں، اور ترکی ان کے ساتھ کھڑا ہے۔”

اس موقع پر پاکستان بلائنڈ اسپورٹس فیڈریشن کے صدر وقاص وڑائچ نے ترکی کے سفیر ڈاکٹر عرفان اور ترکی کے سفارت خانے کا تہہ دل سے شکریہ ادا کرتے ہوئے کہا کہ جس طرح پہلی ملاقات میں انہوں نے بلائنڈ اسپورٹس کے فروغ کے لیے مکمل تعاون کا یقین دلایا تھا، آج انہوں نے عملی طور پر اپنی بات کو سچ کر دکھایا ہے۔ وقاص وڑائچ نے کہا کہ ڈاکٹر عرفان کی سرپرستی میں دونوں ممالک کے درمیان نابینا کھلاڑیوں کے لیے تربیت، تبادلہ پروگرامز، اور بین الاقوامی سطح پر نمائندگی کے نئے دروازے کھلیں گے۔

تقریب میں چیف ایڈیٹر روزنامہ پاسبان عزیزالرحمان مجاہد، مختلف سفارتی شخصیات، کھیلوں سے وابستہ ماہرین، اور نابینا کھلاڑیوں نے بھی شرکت کی۔ شرکاء نے ترکی کے سفارت خانے کی جانب سے اس اہم اعلان کو پاکستان میں خصوصی کھلاڑیوں کے لیے نئی امید اور حوصلے کا پیغام قرار دیا۔

اختتامی تقریب کے اختتام پر شریک ٹیموں اور کھلاڑیوں کو انعامات سے نوازا گیا، جبکہ ترکی کے سفیر ڈاکٹر عرفان کو فیڈریشن کی جانب سے خصوصی شیلڈ پیش کی گئی۔

پاکستان بلائنڈز اسپورٹس فیڈریشن کے صدر نے کہا کہ “ہم اس تعاون کو ایک نئے دور کا آغاز سمجھتے ہیں، جس میں ترکی کی مدد سے پاکستان کے خصوصی کھلاڑی عالمی میدان میں نہ صرف اپنے ملک کا نام روشن کریں گے بلکہ دونوں برادر ممالک کے تعلقات کو بھی مزید مضبوط بنائیں گے۔”