اسلام آباد (پاسبان نیوز) — وزیراعلیٰ بلوچستان سرفراز احمد بگٹی نے پاکستان بلائنڈ اسپورٹس فیڈریشن کی شاندار کارکردگی اور ایشیا پیسفک گول بال چیمپیئن شپ 2025 کے کامیاب انعقاد پر 50 لاکھ روپے کی مالی معاونت کا اعلان کر دیا۔ انہوں نے کہا کہ بلوچستان حکومت خصوصی کھلاڑیوں، خصوصاً نابینا اسپورٹس پرسنز کے فروغ اور سہولیات کی فراہمی کے لیے ہر ممکن سرپرستی جاری رکھے گی۔

گزشتہ روز سینیٹر دنیس کمار کی جانب سے دیوالی کی خوشی میں منعقدہ تقریب کے بعد انٹرنیشنل بلائنڈ کھلاڑیوں کے اعزاز میں عشائیہ دیا گیا، جس میں وزیراعلیٰ بلوچستان سرفراز بگٹی نے بطور مہمانِ خصوصی شرکت کی۔ تقریب میں پاکستان بلائنڈ اسپورٹس فیڈریشن کے صدر وقاص وڑائچ، سابق وزیراعظم انوارالحق کاکڑ، سینیٹر دنیس کمار، سفارتی شخصیات، فیڈریشن کے نمائندگان اور مختلف ممالک سے آئے بلائنڈ ایتھلیٹس بھی موجود تھے۔

اپنے خطاب میں وزیراعلیٰ سرفراز بگٹی نے کہا کہ نابینا کھلاڑی ہماری قوم کا فخر ہیں جو اپنی جسمانی کمزوری کے باوجود غیر معمولی حوصلے اور جذبے کے ساتھ ملک کا نام عالمی سطح پر روشن کر رہے ہیں۔ انہوں نے کہا کہ بلوچستان حکومت خصوصی طور پر بلائنڈ اسپورٹس کی ترقی، کوچنگ اکیڈمیوں کے قیام اور تربیتی سہولیات کی فراہمی کے لیے عملی اقدامات اٹھائے گی تاکہ صوبے کے نوجوان بھی اس میدان میں اپنی صلاحیتوں کا مظاہرہ کر سکیں۔

وزیراعلیٰ نے کہا کہ “ہمیں ایسے اداروں پر فخر ہے جو خصوصی بچوں اور نوجوانوں کے لیے امید، حوصلے اور کامیابی کے دروازے کھول رہے ہیں۔ پاکستان بلائنڈ اسپورٹس فیڈریشن نے ثابت کیا ہے کہ جذبہ اور عزم ہو تو کوئی رکاوٹ بڑی نہیں ہوتی۔” انہوں نے اعلان کیا کہ فیڈریشن کو 50 لاکھ روپے کی امداد فوری طور پر فراہم کی جائے گی، جبکہ مستقبل میں بلوچستان حکومت نابینا کھلاڑیوں کے لیے مزید منصوبے شروع کرے گی۔

اس موقع پر پاکستان بلائنڈ اسپورٹس فیڈریشن کے صدر وقاص وڑائچ نے وزیراعلیٰ بلوچستان کا شکریہ ادا کرتے ہوئے کہا کہ سرفراز بگٹی نے نابینا کھلاڑیوں کی جس طرح حوصلہ افزائی کی ہے، وہ تاریخ میں یاد رکھی جائے گی۔ انہوں نے کہا کہ “بلوچستان کے نوجوانوں میں بے پناہ ٹیلنٹ موجود ہے، اور حکومت کی سرپرستی سے وہ عالمی سطح پر پاکستان کا نام مزید بلند کریں گے۔”

سینیٹر دنیس کمار نے بھی وزیراعلیٰ بلوچستان کا خصوصی شکریہ ادا کرتے ہوئے کہا کہ انہوں نے اپنی مصروفیات کے باوجود تقریب میں شرکت کر کے نہ صرف نابینا کھلاڑیوں کی حوصلہ افزائی کی بلکہ فیڈریشن کی کاوشوں کو سراہ کر یہ پیغام دیا ہے کہ خصوصی افراد بھی معاشرے کا باوقار حصہ ہیں۔ انہوں نے کہا کہ “سرفراز بگٹی جیسے رہنما ہی حقیقی معنوں میں انسانی ہمدردی اور کھیلوں کے فروغ کی علامت ہیں۔”

تقریب میں سابق وزیراعظم انوارالحق کاکڑ، مختلف کھیلوں کی فیڈریشنز کے نمائندوں اور غیر ملکی مہمانوں نے بھی اظہارِ خیال کیا اور نابینا کھلاڑیوں کی کارکردگی کو خراجِ تحسین پیش کیا۔ عشائیہ کے دوران کھلاڑیوں کو یادگاری تحائف اور شیلڈز بھی پیش کی گئیں، جبکہ فیڈریشن کی جانب سے وزیراعلیٰ بلوچستان کو خصوصی یادگاری شیلڈ پیش کی گئی۔

یہ اعلان پاکستان بلائنڈ اسپورٹس فیڈریشن کے لیے ایک تاریخی لمحہ قرار دیا جا رہا ہے، جس سے نہ صرف بلائنڈ اسپورٹس کے فروغ کے نئے امکانات پیدا ہوں گے بلکہ بلوچستان کے خصوصی کھلاڑیوں کو بھی کھیلوں میں آگے بڑھنے کے لیے عملی مواقع فراہم ہوں گے۔ اس تقریب نے اس حقیقت کو اجاگر کیا کہ قومی اتحاد اور حکومتی سرپرستی کے ذریعے خصوصی کھلاڑیوں کے خوابوں کو حقیقت میں بدلا جا سکتا ہے۔