پاسبان نیوز گجرات:

گجرات: وزیرِ اعلیٰ پنجاب محترمہ مریم نواز شریف کی ہدایات کی روشنی میں Punjab Protection of Ownership of Immovable Property Ordinance 2025 کے تحت ضلع گجرات میں زمینوں پر ناجائز قبضوں کے خاتمے اور اصل مالکان کو فوری انصاف کی فراہمی کے لیے عملی اقدامات جاری ہیں۔

اسی سلسلے میں ڈپٹی کمشنر گجرات نورالعین کی سربراہی میں ڈسپیوٹ ریزولوشن کمیٹی (DRC) کا اہم اجلاس منعقد ہوا، جس میں مختلف نوعیت کے اراضی تنازعات کا تفصیلی جائزہ لیا گیا۔ اجلاس کے دوران شواہد، ریکارڈ اور فریقین کے بیانات کی روشنی میں متعدد کیسز کا فیصلہ کیا گیا، جس کے نتیجے میں ناجائز قابضین سے زمین واگزار کروا کر اصل مالکان کے حوالے کر دی گئی۔

ڈپٹی کمشنر نورالعین نے اس موقع پر کہا کہ حکومتِ پنجاب عوام کی ملکیتی اراضی کے تحفظ کو یقینی بنانے کے لیے پرعزم ہے اور کسی کو بھی زبردستی یا غیر قانونی طریقے سے زمین پر قبضے کی اجازت نہیں دی جائے گی۔ انہوں نے واضح کیا کہ DRC کا مقصد عوام کو طویل عدالتی کارروائیوں سے بچاتے ہوئے فوری اور شفاف انصاف فراہم کرنا ہے۔

اجلاس میں ریونیو افسران، قانون نافذ کرنے والے اداروں کے نمائندے اور متعلقہ محکموں کے افسران نے بھی شرکت کی۔ کمیٹی نے زیرِ سماعت مقدمات میں قانون کے مطابق فیصلے کرتے ہوئے آئندہ بھی شکایات پر فوری کارروائی جاری رکھنے کے عزم کا اظہار کیا۔ شہریوں نے وزیرِ اعلیٰ پنجاب محترمہ مریم نواز شریف اور ضلعی انتظامیہ کے اقدامات کو سراہتے ہوئے امید ظاہر کی ہے کہ اس آرڈیننس کے تحت اراضی سے متعلق مسائل کے حل میں تیزی آئے گی اور ناجائز قبضوں کا مؤثر خاتمہ ممکن ہو سکے گا۔