پاسبان نیوز شارجہ: متحدہ عرب امارات میں جاری شدید بارشوں اور غیر مستحکم موسمی صورتحال کے باعث کم لاگت ایئرلائن ایئر عربیہ نے مسافروں کے لیے ٹریول ایڈوائزری جاری کرتے ہوئے ممکنہ پروازوں میں تاخیر سے خبردار کیا ہے۔

ایئر عربیہ کی جانب سے سوشل میڈیا کے سرکاری پلیٹ فارمز پر جاری بیان میں کہا گیا ہے کہ آئندہ 24 گھنٹوں کے دوران یو اے ای آنے اور جانے والی پروازیں متاثر ہو سکتی ہیں، کیونکہ مختلف علاقوں میں شدید بارش کا سلسلہ جاری ہے۔

ایئرلائن کے مطابق موسمی حالات کے باعث بعض پروازوں کی روانگی اور آمد کے اوقات میں تبدیلی یا تاخیر کا امکان ہے، جس پر مسافروں کو پیشگی معلومات حاصل کرنے کی ہدایت کی گئی ہے۔

مسافروں کے لیے ہدایات

ایئر عربیہ نے مسافروں پر زور دیا ہے کہ وہ گھر سے روانہ ہونے سے قبل اپنی پرواز کی تازہ صورتحال ضرور چیک کریں اور کسی بھی ممکنہ پریشانی سے بچنے کے لیے ایئرلائن کے انکوائری دفاتر یا کسٹمر سپورٹ سے رابطہ کریں۔ ایئرلائن انتظامیہ نے مسافروں سے اپیل کی ہے کہ وہ ہوائی اڈوں پر غیر ضروری رش اور انتظار سے بچنے کے لیے بروقت معلومات حاصل کریں اور موسم کی صورتحال کو مدنظر رکھتے ہوئے اپنے سفری منصوبے ترتیب دیں۔