پاسبان نیوز کھاریاں: کھاریاں شہر میں انجمنِ تاجران کے انتخابات کا مرحلہ تیزی سے آگے بڑھ رہا ہے، جہاں مختلف بازاروں میں جمہوری عمل کے تحت نئی باڈیز کے قیام کے لیے سرگرمیاں عروج پر پہنچ چکی ہیں۔ گلیانہ روڈ کھاریاں میں انجمنِ تاجران کے انتخابات مکمل ہونے کے بعد اب باقی تین بڑے بازاروں میں بھی انتخابی عمل کا آغاز ہو چکا ہے۔
ڈنگہ روڈ کھاریاں کے صدر زبیر رضا نے اپنی سابقہ باڈی تحلیل کرتے ہوئے باضابطہ طور پر انتخابات کا اعلان کر دیا ہے اور انتخابی مہم کا آغاز بھی کر دیا ہے۔ تاجر حلقوں میں اس اقدام کو جمہوری اقدار کی پاسداری قرار دیا جا رہا ہے۔ مبصرین کے مطابق زبیر رضا کے فیصلے نے یہ ثابت کر دیا ہے کہ وہ مسلط قیادت کے بجائے شفاف اور جمہوری نظام پر یقین رکھتے ہیں۔
مین بازار کھاریاں میں بھی الیکشن بورڈ کی تشکیل کی تیاریاں مکمل کر لی گئی ہیں، اور امکان ظاہر کیا جا رہا ہے کہ آج یا کل باضابطہ اعلان کر دیا جائے گا۔ تاجر رہنماؤں کے مطابق چاروں بڑے بازاروں کے انتخابات مکمل ہونے کے بعد منتخب صدور باہمی مشاورت سے بیٹھ کر حقیقی اور نمائندہ مرکزی انجمنِ تاجران قائم کریں گے۔
تاجر برادری کے نمائندوں کا کہنا ہے کہ کھاریاں میں کسی جعلی، خود ساختہ یا غیر نمائندہ مرکزی انجمن کا وجود اب ختم ہو چکا ہے، اور آئندہ قیادت کا فیصلہ صرف اور صرف ووٹ کی طاقت سے ہوگا۔
صدر پریس کلب کھاریاں حاجی عبدالرووف نے اس موقع پر کہا کہ کھاریاں کی تاجر برادری ایک نئے اور مثبت دور میں داخل ہو رہی ہے، جہاں اختلافِ رائے کے باوجود جمہوری عمل کو ہی فیصلے کی بنیاد بنایا جا رہا ہے، جو خوش آئند پیش رفت ہے۔ تاجر حلقوں کے مطابق آنے والے دنوں میں انجمنِ تاجران کے انتخابات کھاریاں کی کاروباری سیاست میں ایک نیا رخ متعین کریں گے
