پاسبان نیوز: اسسٹنٹ کمشنر کھاریاں احمد شیر نے گاؤں ڈھلو میں جاری پی ایس ای آر (PSER) سروے کے حوالے سے فیلڈ وزٹ کیا اور سروے ٹیم کی کارکردگی، طریقۂ کار اور عوامی تعاون کا تفصیلی جائزہ لیا۔

دورے کے دوران اسسٹنٹ کمشنر نے اینیومریٹرز کی جانب سے ڈیٹا اکٹھا کرنے کے عمل، فراہم کردہ آلات کے درست استعمال اور مقررہ ایس او پیز پر عملدرآمد کا معائنہ کیا۔ انہوں نے ہدایت کی کہ سروے کو شفاف، بروقت اور معیاری انداز میں مکمل کیا جائے تاکہ حکومت کو درست، مستند اور قابلِ اعتماد اعداد و شمار دستیاب ہو سکیں۔

احمد شیر نے عوام سے بھی اپیل کی کہ وہ سروے ٹیموں کے ساتھ مکمل تعاون کریں تاکہ قومی سطح کے اس اہم سروے کے اہداف بروقت حاصل کیے جا سکیں۔ انہوں نے ٹیم کے اراکین کو مزید محنت، ذمہ داری اور پیشہ ورانہ جذبے کے ساتھ فرائض انجام دینے کی تلقین کی اور کہا کہ ضلعی انتظامیہ کی جانب سے سروے کی کامیابی کے لیے تمام ضروری سہولیات فراہم کی جا رہی ہیں۔ اس موقع پر متعلقہ افسران اور فیلڈ سٹاف بھی موجود تھا