پاسبان نیوز کھاریاں: گلیانہ روڈ کے بعد اب مین بازار کھاریاں میں بھی انجمن تاجران کے انتخابات کی تیاریاں زور و شور سے جاری ہیں۔ تاجروں کی نمائندہ تنظیم کے جمہوری عمل کو آگے بڑھاتے ہوئے 6 رکنی الیکشن بورڈ باقاعدہ طور پر تشکیل دے دیا گیا ہے، جس کے بعد انتخابی سرگرمیوں میں واضح تیزی آ گئی ہے۔

تشکیل دیے گئے الیکشن بورڈ میں شہر کی معتبر، غیر جانبدار اور متحرک شخصیات شامل کی گئی ہیں، جن میں
تصدق رضا صابری، یاسر ڈار، چوہدری عنائت انقلابی، انجئئیر سعید احمد ، ڈاکٹر طارق جمیل اور یاسین خان شامل ہیں۔
الیکشن بورڈ انتخابات کے شیڈول، کاغذاتِ نامزدگی، انتخابی ضابطۂ اخلاق اور شفاف انعقاد کی ذمہ داریاں نبھائے گا۔

تاجر برادری کا کہنا ہے کہ مین بازار میں الیکشن بورڈ کی تشکیل اس بات کا ثبوت ہے کہ کھاریاں میں جعلی اور خودساختہ نمائندگی کے دور کا خاتمہ ہو چکا ہے اور اب تاجر طبقہ اپنے نمائندے خود منتخب کرنے کے لیے پُرعزم ہے۔

بازاروں میں سیاسی و انتخابی بحث کا آغاز ہو چکا ہے، مختلف دھڑوں کی جانب سے مشاورت اور رابطوں کا سلسلہ جاری ہے جبکہ امیدواروں کی ممکنہ فہرستوں پر بھی غور شروع ہو گیا ہے۔

تاجر رہنماؤں کے مطابق چاروں بڑے بازاروں میں انتخابات کے انعقاد کے بعد ایک مضبوط، متحد اور حقیقی مرکزی انجمن تاجران قائم کی جائے گی جو تاجر برادری کے مسائل کے حل، حقوق کے تحفظ اور انتظامیہ سے مؤثر مذاکرات میں کلیدی کردار ادا کرے گی۔ مین بازار میں انتخابی ڈھول بجنے کے بعد کھاریاں کی تاجر سیاست ایک نئے اور فیصلہ کن مرحلے میں داخل ہو چکی ہے، جس کے اثرات آنے والے دنوں میں مزید واضح ہوں گے۔