پاسبان نیوز اسلام آباد

الخدمت فاؤنڈیشن پاکستان کی سنٹرل بورڈ آف مینجمنٹ نے نئی میقات 2025 تا 2028 کے لیے متفقہ طور پر پروفیسر ڈاکٹر حفیظ الرحمن کو الخدمت فاؤنڈیشن پاکستان کا صدر مقرر کر دیا ہے۔ اس فیصلے کو فلاحی و سماجی حلقوں میں خوش آئند قرار دیا جا رہا ہے، جہاں ڈاکٹر حفیظ الرحمن کی قیادت، دیانت داری اور خدمتِ خلق کے وسیع تجربے پر بھرپور اعتماد کا اظہار کیا گیا ہے۔

پروفیسر ڈاکٹر حفیظ الرحمن اس سے قبل بھی الخدمت فاؤنڈیشن کے مختلف کلیدی عہدوں پر خدمات انجام دے چکے ہیں۔ ان کے سابقہ دورانیے میں الخدمت نے تعلیم، صحت، یتیموں کی کفالت، صاف پانی، آفاتِ سماوی میں امدادی سرگرمیوں اور بین الاقوامی انسانی خدمت کے شعبوں میں نمایاں پیش رفت کی۔ ان کی قیادت میں تنظیم نے شفافیت، نظم و ضبط اور مؤثر منصوبہ بندی کو اپنی پہچان بنایا۔

خصوصی طور پر غزہ کے مظلوم عوام کے لیے پروفیسر ڈاکٹر حفیظ الرحمن کی مسلسل، غیر متزلزل اور انتھک جدوجہد کو عالمی سطح پر سراہا جاتا ہے۔ غزہ میں جاری انسانی بحران کے دوران انہوں نے نہ صرف امدادی سرگرمیوں کی قیادت کی بلکہ بین الاقوامی فورمز پر فلسطینی عوام کے لیے آواز بھی بلند کی۔ خوراک، طبی امداد، عارضی رہائش، اور متاثرہ خاندانوں کی بحالی کے لیے الخدمت کے منصوبے ان کی براہِ راست نگرانی میں کامیابی سے جاری رہے۔

ڈاکٹر حفیظ الرحمن کا شمار اُن رہنماؤں میں ہوتا ہے جنہوں نے خدمتِ انسانیت کو محض نعرہ نہیں بلکہ عملی جدوجہد بنایا۔ تعلیم کے میدان میں ان کی خدمات ہوں یا صحت اور سماجی بہبود کے منصوبے، ہر شعبے میں ان کا کردار نمایاں رہا ہے۔ ان کی سادہ طرزِ زندگی، مضبوط انتظامی صلاحیت اور دردِ دل نے الخدمت فاؤنڈیشن کو ایک مؤثر اور قابلِ اعتماد فلاحی ادارے کے طور پر مستحکم کیا۔

الخدمت فاؤنڈیشن کے ذمہ داران کے مطابق نئی میقات میں پروفیسر ڈاکٹر حفیظ الرحمن کی قیادت میں ملک بھر میں فلاحی سرگرمیوں کے دائرہ کار کو مزید وسعت دی جائے گی، جبکہ عالمی سطح پر بالخصوص فلسطین، غزہ اور دیگر متاثرہ خطوں میں امدادی خدمات کو مزید منظم اور مؤثر بنایا جائے گا۔

سماجی و فلاحی حلقوں نے امید ظاہر کی ہے کہ پروفیسر ڈاکٹر حفیظ الرحمن کی قیادت میں الخدمت فاؤنڈیشن پاکستان آئندہ تین برسوں میں خدمتِ انسانیت کے میدان میں نئی مثالیں قائم کرے گی۔