اسلام آباد پاسبان نیوز: کیپیٹل ڈویلپمنٹ اتھارٹی (سی ڈی اے) کے زیر اہتمام وفاقی دارالحکومت اسلام آباد میں رہائشی و کمرشل پلاٹس کی نیلامی کا عمل دوسرے دن بھی جناح کنونشن سینٹر میں جاری رہا۔ نیلامی کے پہلے دو روز میں مجموعی طور پر ابتک 14.809 ارب روپے کے پلاٹس نیلام کئے گئے۔ نیلامی کے عمل کی نگرانی چیئرمین آکشن کمیٹی ممبر فنانس طاہر نعیم اور ممبران آکشن کمیٹی کررہے ہیں۔

تفصیلات کے مطابق، نیلام عام کے دوسرے روز سیکٹر D-12 مرکز کے پلاٹ نمبر 12 کو 1.04 ارب روپے میں نیلام کیا گیا۔ اسی طرح سیکٹر F-10/3 کا پلاٹ نمبر Aـ284 کو 24.60 کڑور روپے میں نیلام کیا گیا۔ اسطرح مجموعی طور پر نیلامی کے دوسرے روز 1.28 بلین روپے کے پلاٹس فروخت کئے گئے۔

مزید برآں، نیلام عام کے پہلے روز بلیو ایریا کا پلاٹ نمبر 15 واقعہ (F-8/G-8) کو 3.52 ارب روپے جبکہ بلیو ایریا کا ہی پلاٹ نمبر 17 واقعہ (F-8/G-8) کو 9.15 ارب روپے میں نیلام کیا گیا۔ نیلامی کے پہلے روز آرچررڈ سکیم، مری روڈ کا پلاٹ نمبر C۔37 کو 42 کڑور 20 لاکھ جبکہ آرچررڈ سکیم، مری روڈ کا ہی پلاٹ نمبر D۔37 کو 42 کڑور روپے میں نیلام ہوا۔

رہائشی و کمرشل پلاٹس کی نیلامی 24 دسمبر تک جناح کنونشن میں جاری رہے گی۔ نیلامی میں مختلف کٹیگریز کے رہائشی و کمرشل پلاٹس سرمایہ کاری کیلئے پیش کئے جارہے ہیں۔

آکشن میں سرمایہ کاروں کو سرمایہ کار دوست اقدامات کے تحت مختلف رعایتیں اور سہولیات فراہم کی جا رہی ہیں۔ کمرشل پلاٹس پر یو ایس ڈالر میں ادائیگی کی صورت پر اضافی 5 فیصد رعایت دی جائیگی۔ کمرشل پلاٹس کی بولی کی منظوری کے 30 دنوں کے اندر یکمشت ادائیگی پر 5 فیصد رعایت بھی دی جائیگی۔ پہلی 25 فیصد ادائیگی کے بعد بلڈنگ پلان کی منظوری کی سہولت بھی فراہم کی جارہی ہے جبکہ 75 فیصد ادائیگی پر پلاٹ کا قبضہ حاصل کیا جاسکتا ہے۔ موصول ہونے والی بولیوں کو مکمل جانچ پڑتال کے بعد سی ڈی اے بورڈ کے سامنے پیش کیا جائے گا جو بولیوں کو منظور یا مسترد کرنے کا مجاز فورم ہے۔

چیئرمین سی ڈی اے محمد علی رندھاوا نے کہا کہ رہائشی و کمرشل پلاٹس کے نیلام عام سے موصول ہونے والی آمدن کو وفاقی دارالحکومت اسلام آباد کی تعمیر و ترقی اور خوبصورتی پر خرچ کیا جائیگا۔