وزیراعلیٰ مریم نواز شریف کے وژن کے تحت “پرواز کارڈ” کا باقاعدہ آغاز

لاہور: وزیراعلیٰ پنجاب مریم نواز شریف کے وژن کے مطابق صوبے کے نوجوانوں کو بااختیار بنانے کے لیے ایک اہم اور انقلابی اقدام کے طور پر “پرواز کارڈ” پروگرام کا آغاز کر دیا گیا ہے۔ اس پروگرام کے تحت ہنرمند نوجوانوں کو بیرونِ ملک روزگار کے مواقع حاصل کرنے کے لیے بلاسود مالی معاونت فراہم کی جائے گی۔

حکومتی ذرائع کے مطابق پرواز کارڈ کے ذریعے نوجوانوں کے ویزہ، ہوائی ٹکٹ اور میڈیکل سمیت تمام ضروری اخراجات پنجاب حکومت برداشت کرے گی، تاکہ مالی رکاوٹیں نوجوانوں کے مستقبل کی راہ میں حائل نہ ہوں۔

یہ پروگرام 18 سال یا اس سے زائد عمر کے ہنرمند نوجوانوں کے لیے متعارف کرایا گیا ہے، جو ایک شفاف اور جدید آن لائن پورٹل کے ذریعے درخواست دے سکیں گے۔ حکام کا کہنا ہے کہ اس اقدام کا مقصد نوجوانوں کو عالمی منڈی میں مسابقت کے قابل بنانا اور بے روزگاری کے مسئلے پر مؤثر قابو پانا ہے۔

وزیراعلیٰ مریم نواز شریف کا کہنا ہے کہ پنجاب کے نوجوان ملک کا قیمتی سرمایہ ہیں اور انہیں باعزت روزگار کے مواقع فراہم کرنا حکومت کی اولین ترجیح ہے۔ پرواز کارڈ نہ صرف نوجوانوں کے روشن مستقبل کی ضمانت بنے گا بلکہ ملکی معیشت کے استحکام میں بھی اہم کردار ادا کرے گا۔