پاسبان نیوز | اٹک : پرنسپل غزالی ایجوکیشن ٹرسٹ اسکول کامرہ اور سابق ڈپٹی سیکرٹری بار ایسوسی ایشن اٹک میڈم غزالی صدیق ایڈووکیٹ نے کہا ہے کہ جماعت اسلامی حقیقی معنوں میں خواتین کے تحفظ، فلاح و بہبود اور معاشرے میں ان کے سیاسی و سماجی مقام کو بلند کرنے کے لیے سنجیدہ اور مؤثر جدوجہد کر رہی ہے۔
وہ خواتین کے ایک وفد کے ہمراہ جماعت اسلامی اٹک کے زیرِ اہتمام “بدل دو نظام” جلسہ عام میں شرکت کے موقع پر نمائندہ پاسبان نیوز سے گفتگو کر رہی تھیں۔ انہوں نے کہا کہ امیر جماعت اسلامی پاکستان حافظ نعیم الرحمن کی قیادت میں “بدل دو نظام” تحریک ملک میں مثبت اور دیرپا تبدیلی کی ضامن بنے گی اور یہ تحریک اپنی منزل حاصل کر کے رہے گی۔
میڈم غزالی صدیق ایڈووکیٹ کا کہنا تھا کہ جماعت اسلامی کا منشور خواتین کو تعلیم، روزگار، انصاف اور فیصلہ سازی کے عمل میں باعزت مقام دینے پر مبنی ہے، جو موجودہ حالات میں وقت کی اہم ترین ضرورت ہے۔ انہوں نے کہا کہ ایک منصفانہ اور اسلامی فلاحی نظام ہی خواتین سمیت پورے معاشرے کو درپیش مسائل کا حقیقی حل پیش کر سکتا ہے۔
انہوں نے خواتین پر زور دیا کہ وہ اپنے حقوق کے تحفظ اور معاشرے میں مثبت تبدیلی کے لیے جماعت اسلامی کے پلیٹ فارم سے فعال کردار ادا کریں، کیونکہ یہی جماعت عملی سیاست کے ذریعے عوامی مسائل کے حل پر یقین رکھتی ہے۔
جلسہ عام میں خواتین کی بڑی تعداد کی شرکت کو انہوں نے خوش آئند قرار دیا اور کہا کہ یہ عوامی شعور کی بیداری اور نظام کی تبدیلی کی طرف ایک مضبوط قدم ہے۔
