پاسبان نیوز لاہور: حلقہ خواتین جماعت اسلامی پنجاب کے زیر اہتمام پنجاب بلدیاتی ایکٹ 2025ئ (کالا قانون) کے خلاف اور صوبہ گیر عوامی ریفرنڈم سے آگاہی کے لیےمنعقدہ پریس کانفرنس سے سیکرٹری جنرل حلقہ خواتین جماعت اسلامی پاکستان ڈاکٹر حمیرا طارق، ڈپٹی سیکرٹری ثمینہ سعید، اور صدر وسطی پنجاب نازیہ توحید نے خطاب کیا ۔

سیکرٹری جنرل حلقہ خواتین جماعت اسلامی پاکستان ڈاکٹر حمیرا طارق نے کہا کہ صوبائی حکومتوں کی جانب سے نت نئے ہتھکنڈوں کے ذریعے نچلی سطح پر عوام کے مسائل کے حل کے لیے بااختیار مقامی حکومتیں قائم نہ کرنا کھلی غیر جمہوری اور عوام دشمن پالیسی ہے۔ انہوں نے کہا کہ پنجاب حکومت 2015ئ کے بعد سے بلدیاتی انتخابات کرانے میں مکمل طور پر ناکام رہی ہے، جو آئین کے آرٹیکل 140-اے کی صریح خلاف ورزی ہے۔ پنجاب بلدیاتی ایکٹ 2025ئ ایک کالا قانون ہے جس کا مقصد اختیارات کو عوام کے بجائے بیوروکریسی کے ہاتھ میں دینا ہے۔