پاکستان کے ممتاز بزنس مین اور چیئرمین نیوائیرپورٹ سٹی اسلام آبادراجہ سجاد حسین نے پاکستان سٹوڈنٹ اولمپکس کے زیرِ اہتمام منعقد ہونے والی تیسری سالانہ نیشنل سٹوڈنٹ گیمز کا باوقار افتتاح کر دیا۔ یہ شاندار تقریب نمل یونیورسٹی اسلام آباد میں جوش و خروش، نظم و ضبط اور قومی جذبے کے ساتھ منعقد ہوئی، جس میں ملک بھر سے طلبہ کھلاڑیوں نے بھرپور شرکت کی۔
مہمانِ خصوصی راجہ سجاد حسین جب یونیورسٹی پہنچے تو سینئر نائب صدر چوہدری ندیم منظور بیگہ اور دیگر منتظمین نے ان کا پرتپاک استقبال کیا۔ افتتاحی تقریب کا ماحول دیدنی تھا، جہاں نوجوانوں کے چہروں پر عزم، جوش اور کامیابی کی چمک نمایاں تھی۔
اپنے خطاب میں راجہ سجاد حسین نے نوجوان کھلاڑیوں کی حوصلہ افزائی کرتے ہوئے کہا کہ صحت مند اور مضبوط معاشرہ تشکیل دینے کے لیے کھیلوں کا فروغ ناگزیر ہے۔ کھیل نوجوان نسل میں خود اعتمادی، نظم و ضبط، برداشت اور ٹیم ورک جیسے اوصاف پیدا کرتے ہیں، جو عملی زندگی میں کامیابی کی بنیاد بنتے ہیں۔ انہوں نے کہا کہ ایسے مثبت اور تعمیری ایونٹس نوجوانوں کو منفی سرگرمیوں سے دور رکھ کر انہیں قومی ترقی کے دھارے میں شامل کرتے ہیں۔
انہوں نے پاکستان سٹوڈنٹ اولمپکس کی قیادت اور منتظمین کی کاوشوں کو سراہتے ہوئے اس عزم کا اظہار کیا کہ وہ آئندہ بھی تعلیمی اور کھیلوں کی سرگرمیوں کی سرپرستی جاری رکھیں گے اور نوجوان ٹیلنٹ کو آگے بڑھانے میں اپنا بھرپور کردار ادا کرتے رہیں گے۔
تقریب کے اختتام پر چوہدری ندیم منظور بیگہ نے مہمانِ خصوصی کو یادگاری شیلڈ پیش کی، جس پر ہال تالیوں سے گونج اٹھا۔ شرکاء نے اس کامیاب انعقاد پر منتظمین کو مبارکباد دی اور امید ظاہر کی کہ پاکستان سٹوڈنٹ اولمپکس آئندہ بھی اسی جذبے اور عزم کے ساتھ نوجوانوں کو اپنی صلاحیتیں منوانے کے مواقع فراہم کرتا رہے گا۔
یہ تقریب نہ صرف کھیلوں کے فروغ کا مظہر بنی بلکہ نوجوان نسل کے روشن اور باصلاحیت مستقبل کی نوید بھی ثابت ہوئی۔
