گجرات:
پاکستان میں پولیو کے خاتمے کے لیے 2025 کی آخری قومی پولیو ویکسین مہم کا آغاز کر دیا گیا ہے، جس کے دوران ملک بھر میں پانچ سال سے کم عمر کے 4 کروڑ 50 لاکھ بچوں کو پولیو سے بچاؤ کے قطرے پلانے کا ہدف مقرر کیا گیا ہے۔
حکام کے مطابق مہم کے دوران سیکیورٹی کے خصوصی انتظامات کیے گئے ہیں اور پولیو ٹیموں کے تحفظ کے لیے پولیس اور قانون نافذ کرنے والے اداروں کو تعینات کیا گیا ہے تاکہ مہم کو بلا تعطل اور محفوظ انداز میں مکمل کیا جا سکے۔
نیشنل ایمرجنسی آپریشن سینٹر کا کہنا ہے کہ حالیہ مہینوں میں پولیو کیسز میں اضافے کے پیش نظر یہ مہم انتہائی اہم قرار دی جا رہی ہے۔ والدین سے اپیل کی گئی ہے کہ وہ اپنے بچوں کو پولیو کے قطرے لازمی پلوائیں تاکہ ملک کو پولیو فری بنانے کا ہدف حاصل کیا جا سکے۔
محکمہ صحت کے حکام کے مطابق پولیو کے مکمل خاتمے کے لیے عوامی تعاون، مؤثر نگرانی اور مسلسل ویکسینیشن ناگزیر ہے، جبکہ کسی بھی قسم کی غفلت بیماری کے پھیلاؤ کا سبب بن سکتی ہے۔
واضح رہے کہ پاکستان دنیا کے ان چند ممالک میں شامل ہے جہاں پولیو وائرس اب بھی موجود ہے، تاہم حکومتی ادارے اور عالمی شراکت دار مشترکہ کوششوں سے اس موذی مرض کے خاتمے کے لیے سرگرم ہیں۔
